جلس والد العروسة بألاطة وزير سابق واضعاً رجل على رجل ثم نظر لي بنظرة ملأها التحدي وسألني هذا السؤال الطبقي العنصري البغيض "هتقدر تعيش بنتي في المستوى ده؟"
بصيت على إيده عشان أشوف المستوى اللي بيشاور عليه. بس فهمت إن قصده المستوى الإجتماعى والشقة والعربية واشتراك الدوري الإنجليزي والحاجات دي. فكرت في إجابة للسؤال ولكن للأسف هو سؤال من النوع اللي لا يمكن الإجابة عليه.. لو قلت آه هبقى كإني مضيت شيك على بياض وهفضل طول عمري مطالب إني أجيبلها كل حاجة.. ولو قلت لأ يبقى غالباً كده هخسر تمن علبة الشيكولاته وهيبقى الراجل علم عليا من أول سؤال.. وجيم أوفر.
قلت بس.. أنا لازم أوريه إني شاب دماغ وأعرفه إن العقل السليم في الجسم السليم وأستعرض عليه قدراتي الفلسفية الفذة.. خدت نفس عميق وبصيتله بصه كلها تأثر وقلت بصوت متهدج (متهدج يعني حساس كده) "يا عمي مش أنا اللي هعيشها.. ربنا هو اللي بيعيشنا وهو اللي بيرزقنا.. أنا ممكن أكون دلوقتي مش هقدر بس في المستقبل ممكن ربنا يفتحها عليا وأبقى مليونير.. وممكن أكون دلوقتي غني بس بعد الجواز أخسر كل فلوسي"
"أيوه ونعم بالله.. بس أنا عايز أطمن على بنتي.. إحتمال إنك تكون فقير وتبقى غني أقل بكتير من إحتمال إنك تكون غنى وتفضل غني"
في اللحظة دى بالتحديد بدأت أحس إن الراجل ده مش سهل.. أنا كمان مش سهل بس حسيت إن هو أصعب منى.. وبدأت أفكر في كلامه وإن لو أنا مكانه وجه واحد إتقدم لبنتي اللي أكيد هكون عايز أطمن عليها هتصرف إزاي؟..
أولا الراجل عايز بنته تتجوز واحد معاه فلوس كتير عشان يطمن عليها.. أنا عندي اعتراض أصلاً على المنطق عشان الفلوس ملهاش أي علاقة بالسعادة.. سيبك من إن المجتمع بيقول على فلان إنه راجل "مبسوط" لما يبقى معاه فلوس.. بس إنت لو نزلت عملت استطلاع رأي على نسبة الناس المبسوطة في حي الزمالك.. ونسبة الناس المبسوطة في قرية كفر البطاطا هتلاقي النسبة تقريباً متطابقة.. الفرق بيكون في نوعية المشاكل مش في وجودها من عدمه.
ممكن أفهم إنه يكون عايز بنته تقابل نفس نوع المشاكل اللي هي متعودة عليها.. مش عايزها مثلاً ييجي عليها يوم تلاقي فيه نفسها مش قادرة تدفع اشتراك خدمة البلاكبيري أو اشتراك الجيم. الانسان لما بيواجه نوع جديد من المشاكل ممكن مايعرفش يحلها.. بس برضو ده ملوش أي علاقة بالسعادة.
ثانياً.. هو اتكلم عن الاحتمالات وقال جملة معقدة مش عايز اكتبها تاني.. ولكن أنا ممكن أسأله نفس السؤال.. هل هو يضمن إنه يعيش بنته في المستوى ده لحد ما يموت؟ أجمل حاجة في الحياة إنها لسه ماخلصتش.. يعني لسه في جديد كل يوم وكل ساعة وكل لحظة.. محدش ضامن حاجة وعشان كده أقصى حاجة ممكن نعملها إننا نتأكد إن الأساس موجود ونسيب الفرص تيجي براحتها. لو كنت انا جمال مبارك واتقدمت لبنته من ست شهور بس كان ممكن يكون هو اللي بيدفعلي المهر.. بس كان هيبقى زمانه دلوقتي بيزورني في طرة ده إذا ماكانش قاعد معايا جوه. الحكمة الخالدة بتقول "مفيش حاجة بتفضل على حالها"
ثالث حاجة ده جواز.. ( اسمع الموسيقى دي عشان الكلام اللي جاي حساس
جواز يعني علاقة انسانية بحتة مش صفقة محتاجة راس مال ودراسة جدوى.. ممكن وجود الانسان مع انسان بيحبه يكون لوحده كفاية جداً ويقدر يعوض حاجات كتير..
الجواز لو هشبهه بحاجة فهو – مع الفرق- زي صفقات النادي الأهلي.. اللاعيب اللي عايز الأهلي والأهلي عايزه لازم يروح الأهلي في النهاية.. لو مش السنادي يبقى السنة الجاية.. حتى لو النادي بتاعه مش موافق برضو الأهلي بيتصرف.. وحتى لو النادي طلب فلوس أكتر أو شروط أصعب.. حب اللاعب للأهلي بينتصر في النهاية..
عشان كده أنا مقتنع إن بإذن الله هييجي اليوم اللي هروح فيه الأهلي.. مهما كان رأى أهله.
· أتمنى محدش يسألني هل أحداث المقال حقيقية ولا لأ عشان عايز أجرب أعيش إحساس الشاب الغامض.
