مارلبورو أحمر

هاتطلبوا دلوقتي ولّا كمان شوية؟ كان ذلك هو التساؤل الذي وجهه لنا القهوجي في عصبية غير مبررة.. قال له صديقي في براءة: عندك إيه ساقع؟.. رد بدون تفكير عندي عناب.. عندي ليمون.. عندي زبادي.. عندي جوافه.. عندي موز..

سألته طب عندك إيه سخن؟.. رد في ملل عندي شاي.. عندي نسكافيه.. عندي كاكاو.. عندي سحلب.. عندي ينسون

لم أكن أفهم الحكمة وراء إصراره على تكرار كلمة عندي قبل كل صنف ولكني لم أكن متأكداً من مدى تقبله لفكرة أن أسأله عن شيء كهذا. فضلت أن أختصر الحوار فطلبت كوبين من الشاي

قال صديقي في شرود: نفسي أتجوز بقى عشان أبطل أعد عالقهاوي.. أكيد ساعتها مش هيهون عليا أعد على قهوة وأسيب مراتي قاعدة لوحدها في البيت تكلم الحيطان

قلت له متسائلاً: طب وليه تعسف نفسك وتحس بالذنب كده؟.. ما بلاش تتجوز من الأصل

رد وكأنه لم يسمعني: المشكلة إنك تلاقيها بس

قلت له:  بيقولوا البنات على قفا من يشيل

لوح بيده قائلاً: بس لما تيجي تشيل.. بتاخد على قفاك فعلاً

في هذه اللحظة جاء القهوجي ومعه الشاي فالتزمنا الصمت احتراماً لجلال اللحظة.. ثم انصرف فقال صديقي وهو يضع السكر في الشاي.. عارف الجواز ده زي إيه؟ زي شرب السجاير.. بيبدأ بكلمة عايز أجرب ويخلص ب ياريتني.. تشوف كل اللي حواليك بيشربوا فتحس إنك لازم تشرب وإلا تبقى مجنون.. بتحب تدفع أكتر وانت مش واخد بالك إنك كل اللي بتعمله إنك بتزود على قايمة خسايرك خساير مادية كمان.. زي اللي بيبقى مبسوط أوي وهو بيشرب مارلبورو أحمر مع إن العلبة تمنها يقطم الضهر وهي أصلاً سجاير.. يعني بتبوظك ومضرة جداً للصحة

سعل مرتين ثم أضاف: وبتسبب الوفاة

لم أجد تعليقاً يعبر عن مدى اعتراضي على كلامه فاكتفيت بأن سألته: إنت مقتنع باللي بتقوله ده؟

أخذ رشفة من كوب الشاي ثم رد بهدوء: بص يا ريس.. أنا هقولك الكلام ده بعد ما الدنيا خدت منى كتير.. الانسان بيحب الحاجات اللي بتضره بالظبط زي الحاجات اللي بتفيده ويمكن أكتر كمان.. اتفرج على نفسك كده لمدة يوم كامل، هتلاقي إن أكتر من نص وقتك بيضيع في حاجات مالهاش أي لازمة

قاطعته قائلاً: عندك حق بدليل إني قاعد معاك دلوقتي

هز رأسه موافقة ثم استطرد: مع إن قدامك تعمل حاجات مفيدة وممكن تكون سهلة وبسيطة.. بس المشكلة إن الحاجات دي بتبقى غالباً خنيقة.. ماتهزش دماغك ما أنا عارف.. وزي فكرة المارلبورو برضو.. بتحب تدفع أكتر مع إنك أصلاً بتعمل حاجة مالهاش أي لازمة

شايف كل اللي حواليك دول.. كلهم بيشربوا مارلبورو حتى لو مش بيدخنوا أصلاً.. ماتستغربش.. كل واحد منهم لو معاه فلوس هيروح يقعد في أغلى كافيه مع إنه أصلاً بيهلك وقت.. لو معاه فلوس هيروح يصيف في أغلى مكان في مصر، مع إن الأماكن دي غالباً لازم تمشي فيها وانت مغمض عينيك الاتنين عشان غض البصر مش هينفعك.. خلاص بلاش دي أنا عارفك ليبرالي فاجر.. الجواز برضو نفس الحوار.. إنت بتخسر حاجات كتير ورغم إن إنت عارف كده كويس تلاقي نفسك بتعمل فرح ب 40 ألف.. بذمتك دي جملة منطقية؟ إزاي فرح و ب 40 ألف.. ما هو لو دفعت 40 ألف في ليلة أكيد الفرح هيبقى ملوش وجود في مشاعري.. بس تقول إيه بقى

سألته يعني عايز تقنعني إنك مش عايز تتجوز؟

مرت ثوان من الصمت.. أخرج من جيبه علبة سجائر مارلبورو.. أشعل سيجارة ونفث دخانها قائلاً في شرود: الانسان ضعيف مفيش كلام

·        من كتاب مذكرات واحد صاحبي.. قريباً