سألته "طب وبعدين؟".. أجاب قائلاً:
"ولا قبلين يا باشا.. تصدق بالله.. أنا يوم ما مبارك تنحى حسيت إني اتولدت من جديد.. مع إني كنت مش عايزه يمشي وقلت نستنى الست شهور الدول الدنيا مش هتطير.. ويوم جمعة الغضب قفلت باب الشقة بالمفتاح وحطيته في جيبي عشان الواد ابنى ما ينزلش المظاهرات.. بس طلع ناصح وخد المفتاح اللي مع أمه.
الواد كان بيقوللي إن أنا السبب اللي خلاه ينزل المظاهرات.. تخيل!!.. كان بيقوللي إنه لما كان بيبصلي وأنا طافح الكوته ومش لاحق آخد نفسي من الجري ورا لقمة العيش.. كان بيبقى نفسه يعمل أي حاجة تخليه مايبقاش زيي.. كان عايز يعيش عيشة تانية.
إحنا عيشتنا ماكانتش وحشة والله.. كنا بنشقى ونتعب صحيح.. بس الانسان لازم يتعب عشان يُرزق.. أنا بس اللي كان مضايقني شوية إني كنت حاسس إني حمار ومش فاهم حاجة.
كنت بقرا في الجرايد إن الاقتصاد بتاعنا ميت فل وعشرة.. وأعد أسأل نفسي هو أنا مش داخل جوه الاقتصاد بتاعنا ولا إيه؟.. طب أنا عايز أشترك فيه.. أعمل إيه يا جدعان؟
كنت ألاقي نص المرتب اتفرتك في دروس العيال.. وأقول اللهم لا اعتراض.. بس كنت أفتح التليفزيون ألاقي واحد لابس بدلة وشكله وزير وعمال يحلف ويتقطع إنه مش هيتنازل عن مجانية التعليم.. آه والله طلعوا فاكرين إن التعليم ببلاش.. هاهاهاها..
دلوقتي بقى وقعنا في مشكلة تانية.. زمان محدش كان بيسأل فينا وكانوا سايبينا نقطع في لحمنا ولا واحد منهم حتى يطلع يقولنا إزيكوا يا شعب.. دلوقتي كل الناس بقت بتكلمنا لما الواحد جاله صداع.. يفتح التليفزيون يلاقي قرارات.. يفتح الفيسبوك يلاقي بيانات.. حتى الموبايل بقى مليان رسايل.. كل ده حلو وجميل.. بس كلام لا بيحل ولا بيربط.
عارف يا بيه.. الناس اللي قاعدة في التليفزيون دول كلهم مش فاهمين حاجة.. وكل اللي لابسين كرافتات عمرهم ما هيحلوها.. خدت بالك يا باشا إن البرامج دي اسمها "توك شو" يعني "عرض كلام".. هري يعني ولوك لوك و ويك ويك.. تلاقي الواحد من دول قاعد في البرنامج كإنه عنده علم الدنيا والآخرة.. ويقولك كإنه جاب التايهة "مشاكل مصر كلها حلها في حاجة واحدة.. التعليم".. لا يا راجل.. إزاي يعني؟.. نزود مرتبات المدرسين.. ولا نبني مدارس جديدة.. ولا نغير المناهج.. ولا نولع في العيال.. يقولك "لأ.. دي منظومة متكاملة".. بالذمة ده كلام يأكّل عيش.. طب نجيب منين فلوس عشان المنظومة دي؟ ونجيب منين الناس اللي هتشغلها؟
ييجوا يتكلموا في الوحدة الوطنية.. تلاقي كل واحد يقولك "لازم نطبق القانون على الكل".. كلهم بيقولوا نفس الكلام كإنهم متفقين مع بعض.. قانون إيه بس يا باشمهندس.. إذا كان اللي هيطبق القانون نفسه دماغه بايظه وجواه فتنة طائفية.. ما كلنا عارفين إن المسلمين والمسيحيين مش زي السكينة في الحلاوة يعني.. لكن ماحدش من الجماعة المثقفين عايز يقولنا إن التلميذ المسيحي لما كان بيطلع بره الفصل ويعد في الحوش في حصة الدين كان بيحس إنه مظلوم.. محدش عايز يقول المشاكل وعشان كده عمرهم ما هيعرفوا يحلوها.
حتى شباب الثورة.. على فكرة أنا ثورجي قديم ومتصور في ميدان التحرير مع العيال.. بس ساعات بتخنق من شباب الثورة دول.. يقولك نعمل مليونية الوحدة الوطنية.. طب ليه المليون نفر دول مانزلش منهم حتى 500 عشان يفضوا الخناقة اللي حصلت عند الكنيسة.
وفيهم واحد اسمه عمرو حمزاوي.. شكله كده يخليك تحس إنه زي المخترعين العباقرة.. والواد ما شاء الله زي اللبلب.. يفتح بقه من هنا تلاقي الكلام نازل فوق ودانك طاخ طراخ ديب دوش.. ليبرالية على علمانية على سمسمية وكلام كده إحنا مابنفهموش يا بيه.. والله العظيم ما بنفهمه!.. أنا عايز أعرف هو مش عارف إن الشعب نصه بهايم؟.. ليه الجماعة المثقفين بينبحوا حسهم في النصايح اللي الشعب مش بيفهمها؟.. ما إحنا قلنا نعم برضو يوم تعديل الدستور وما أثرش فينا الهري ده.
نيجي بقى للبلطجية.. بصراحة الداخلية بقت عاملة زي أمير عبدالحميد اللي كان حارس مرمى الأهلي.. كل ما كان ييجي فيه جون نقول اصبروا عليه يا جدعان الواد لسه بيتأسس.. يدخل جون تاني نقول معلش واحدة واحدة هيبقى وحش بعون الله.. لحد ما الدورى كان هيضيع لولا ستر ربنا وراس فلافيو.. الداخلية شكلها هتضيع مننا البلد وإحنا لسه بنطبطب عليها.. على فكرة.. إحنا أجمد من الداخلية.. إوعى تكون نسيت إننا غلبنا جيش الأمن المركزي يوم جمعة الغضب.. بس اللي مجنني ليه وائل غنيم ما ينزلش الشباب كلهم في يوم جمعة كده عشان يحاربوا البلطجية.. شباب كل منطقة ينزلوا يهجموا عالبلطجية مرة واحدة.. أكيد البلطجية مش أجمد من الأمن المركزي.. أنا عارف إنك ليك في الفيس بوك وكده.. إبقى قول لوائل عالفكرة دي اعمل معروف.
وائل غنيم ده على فكرة واد سوبر.. قال قدام الناس إنه ملوش في السياسة وخلع بدري بدري..أصل مش كل الوطنيين بيفهموا في السياسة.. بس إحنا لما بنحب حد بنبقى عايزينه يبقى كل حاجة في كل حاجة.. ما إنت شفت بنفسك إزاي الناس بدأت تحب عصام شرف أول ما عرفت إنه أكل فول عند التابعى.. ولما ابنه دفع المخالفة قالوا لأ بقى.. ده لازم يبقى رئيس جمهورية.. طب ما أنا بدفع دم قلبي إتاوات ومخالفات للأمناء ولا حد فكر يعيني حتى كاتب في مصلحة درجة سابعة.. عصام شرف راجل بريمو ومحترم بس لو كانت الرئاسة بأكل الفول يبقى نعين جاد رئيس جمهورية والتابعي رئيس وزراء.. زي كده محمود الخطيب كان لعيب حريف ما يتكررش.. بس هو نفسه قال إنه ما مالوش في التدريب.
عارف يا بيه مصر مشاكلها هتتحل إمتى؟... لما اللي مش عارف يحلها يسيب حد غيره يحلها."
